حمص

تغميسه الحمص اللذيذة. احنا في الخليج نسمي الحمص الحبك نخي، ونسمي الحمص بالطحينية حمص، ليش قاعده اقولكم هالمعلومة؟ لاني مرات اسوي التغميسة (الحمص) من بقوليات ثانية. ابتديت بهالشي ايا مطعم جوناز ايتيري، في سنة من السنين كان وايد صعب احصل نخي عضوي في الكويت فقمت استخدم فاصوليات ثانية مثل العايشة خانوم والفاصوليا البيضا والفاصوليا السودا. كل واحده منهم لها نكهة مميزه وحلوه. فتقدرون تجربون. الوصفه نفسها بس نغير الفاصوليا. النخي وطريقة طبخه وايد ناس تسألني شلون اطبخ النخي بأقل وقت لان النخي ياخذ مرات اكثر ٤ ساعات طبخ. شوفوا يا محفوظين السلامة، انا الصبر عندي مليون ولان ماعندي مسؤوليات الام الي تشتغل فعادي عندي ٤ ساعات بس ادري ان مو كل الناس عندهم نفس الوقت والقدره فخل اقولكم. اول شي انقع النخي ١٢ ساعة مع رشة بكربونات الصودا العضوية، البكربونات الصودا راح تخلي الحبوب تمتص مااي اكثر واطريها اسرع في الطبخ. اتعرفون راعي النخي والباجيلا في الجمعيه؟ اهو يحط بكربونات الصودا مع النخي في الطباخ عشان جذي يكون النخي ماله وايد لين. انا احطه مع النخي بالتنقيع مو الطباخ. عاد اذا بتطبخونه مع بيكربونات الصودا حطوا قفشة شاي صغيره خاصة والا راح يعطيكم طعم كريه. فالحين عرفنا ان بيكربونات الصودا تسرع واطري. الاستنبات يساعد يقلل وقت الطباخ. والطريقه الثالثة اهي الطبخ بجدر الضغط.

Uh-oh! We're unable to calculate nutrition for this recipe because some ingredients aren't recognized.